កម្ពុជា-ថៃ ឯកភាពគ្នាលើបទឈប់បាញ់គិតចាប់ពីម៉ោង ១២ថ្ងៃត្រង់, ទាហាន១៨នាក់នឹងអាចត្រលប់មកមាតុភូមិវិញ

កម្ពុជា និងថៃ បានចុះហត្ថលេខាជាផ្លូវការលើកិច្ចព្រមព្រៀងឈប់បាញ់រួមគ្នា បន្ទាប់ពីកិច្ចប្រជុំពិសេសលើកទីបីរបស់គណៈកម្មាធិការព្រំដែនទូទៅ (GBC)។ កិច្ចព្រមព្រៀងនេះ ដែលបានចុះហត្ថលេខានៅព្រឹកថ្ងៃទី ២៧ ខែធ្នូ នៅចំណុចត្រួតពិនិត្យព្រំដែនអចិន្ត្រៃយ៍ប៉ៃលិន-ច័ន្ទបុរី ពាក់ព័ន្ធនឹងការប្រើប្រាស់អាវុធគ្រប់ប្រភេទ ក្នុងគ្រប់ករណី និងនៅគ្រប់តំបន់ ដោយរាប់បញ្ចូលទាំងការវាយប្រហារលើជនស៊ីវិល គោលដៅនិងហេដ្ឋារចនាសម្ព័ន្ធស៊ីវិល និងកម្មវត្ថុ ខាងយោធារបស់ភាគីម្ខាងទៀត។

បទឈប់បាញ់នេះគ្រោងនឹងចូលជាធរមាននៅម៉ោង 12:00 PM (ថ្ងៃត្រង់) ម៉ោងក្នុងស្រុកនៅថ្ងៃទី 27 ខែធ្នូ ឆ្នាំ 2025។ ក្រោមលក្ខខណ្ឌនៃ "សេចក្តីថ្លែងការណ៍រួមនៃកិច្ចប្រជុំពិសេសលើកទីបីរបស់គណៈកម្មាធិការព្រំដែនកម្ពុជា-ថៃ" ប្រទេសទាំងពីរបានប្តេជ្ញាចិត្តថា៖

១. បញ្ឈប់ជាបន្ទាន់នូវជម្លោះប្រដាប់អាវុធទាំងអស់តាមបណ្តោយព្រំដែន។

២. រក្សាការឈរជើងនៃកងកម្លាំងរបស់ខ្លួននៅទីតាំងបច្ចុប្បន្នដោយហាមឃាត់យ៉ាងតឹងរ៉ឹងលើចលនាកងទ័ពបន្ថែមទៀត។

៣. ធានាការវិលត្រឡប់របស់ប្រជាជនព្រំដែនដែលត្រូវបានផ្លាស់ទីលំនៅទៅកាន់ផ្ទះរបស់ពួកគេដោយសុវត្ថិភាព និងជៀសវាងសកម្មភាពណាមួយដែលអាចបង្កើនភាពតានតឹង។

កិច្ចប្រជុំនេះត្រូវបានដឹកនាំដោយឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា នាយឧត្តមសេនីយ៍ ទៀ សីហា និងរដ្ឋមន្ត្រីក្រសួងការពារជាតិថៃ Nattaphon Narkphanit។ ដំណើរការនេះត្រូវបានត្រួតពិនិត្យដោយបេសកកម្មសង្កេតការណ៍អាស៊ានពីប្រទេសទាំងពីរ ដើម្បីធានាបាននូវតម្លាភាព។

បទប្បញ្ញត្តិសំខាន់មួយនៃកិច្ចព្រមព្រៀងនេះ រួមមានការបញ្ជូនទាហានកម្ពុជាចំនួន 18 នាក់ ដែលកំពុងជាប់ឃុំឃាំងនៅក្នុងប្រទេសថៃឲត្រលប់មកមាតុភូមិវិញ។ ការផ្ទេរនេះនឹងធ្វើឡើងនៅពេលដែលបទឈប់បាញ់ត្រូវបានរក្សាដោយជោគជ័យរយៈពេល 72 ម៉ោង។